Books

“طبعًا يا صديقي ما بقاش فيه دلوقتي ست حلوة وست وحشة ولا ست فرفوشة وست نكدية.

لكن فيه ست جوزها بيعاملها كويس ويدلعها ويديها فلوس تسافر بيروت تنفخ وتشفط فترجعله هيفاء عجرم.

وفيه ست جوزها بيهينها ويقلل منها ويديها فلوس تروح السوق تشتري الخضار وتدفع الإيجار فترجعله تفيدة عبد المتجلي.

يعني اللي بيصنع الاتنين هما فلوسك ومعاملتك وطبعًا حضرتك مفلس زي حالاتي يبقى مافيش قدامك حل غير إنك تعاملها كويس.

بس علشان تعاملها كويس لازم الأول تفهم شخصيتها واحتياجاتها وتعرف هي بتحب إيه وبتكره إيه، علشان كده أنا عملت لك الكتاب ده اللي هتقدر من خلاله تحل شفرتها وتعرف كل حاجة عنها، وبكده ترجعلك هيفاء عجرم ومن غير ولا مليم.

أي خدمة!”

شُفتها بعيني داخلة المكتبة وهيَّ بتتلفت شمال ويمين، ولمَّا اتأكدت إن مفيش غيرها، في ثانية كانت خاطفة الكتاب ومخبياه ورا ضهرها.
أنا بصراحة في الأول – ورغم مظهرها الأنيق – توقَّعت أنها هتسرق الكتاب وتمشي، لكن فجأة لقيتها بتتحرك تاني وبمُنتهى التوتر ناحية الكاشير.. دفعتْ وجِريتْ على بره.
أنا طبعًا الفضول كلني، ودخلت أسأله هيَّ ليه كانت متوترة بالشكل ده؟
– يا باشا ما انا خدت على كده.. أي واحدة بتشتري الكتاب ده بتبقى مكسوفة وخايفة حد يشوفها.
– ليه إن شاء الله؟! كتاب كيف تزرع الهيروين؟!
– يا ريت.. ده كتاب «Why Men Love Bitches» بتاع «شيري أرجوف».
أنا طبعًا وقعت على روحي من الضحك وأنا بافتكر شكل محمود صاحبي ليلة زفافه وهو داخل الصيدلية يسأل على حبوب مُنشطة… للذاكرة.

في السنة اللي عمل فيها جون جراي كتابه الشهير الرجال من المريخ والنساء من الزهرة… عملنا كتاب الرجال من بولاق والنساء من أول فيصل… واللي باع أكتر من خمسين نسخة.
كتب عربي… أم الأجنبي…
ورغم ذلك ومع كل احترامنا للدكتور وكتابه الرائع… لكن برضه الكتاب ناقص مواضيع كتير ومهمة… يعني مثلًا ماتكلمش على سيكولوجية الفانلة الحمالات للزوج ومدى تأثير ريحتها على الزوجة، ولا حتى اتكلم على مناخير الزوج وعلاقتها بحاسة السمع عند الزوجة أثناء النوم، كمان الكتاب تجاهل عمدًا التعرض للاختلافات الجوهرية بين الزوجة اللي بتعرف ترقص والزوجة اللي مابتعرفش وعلاقتهما بخيانة الزوج أو رغبته في الزواج بأخرى… وغيرها وغيرها (بس الواحد مش عايز يتكلم) من المواضيع شديدة الحساسية والتي تمس صلب العلاقة بين الراجل والمرأة الشرقيين… (اللي هما من الشرقية يعني)…